Өндірістік қауіпсіздік жөніндегі көшпелі мәжіліс Богатырь Көмір және Екібастұз 1-МАЭС-те өтті.

Тихомиров Евгений February 28, 2025

Өндірістік қауіпсіздік аудитінің нәтижелері бойынша қорытынды мәжіліс «Самұрық-Қазына» АҚ Корпоративтік басқару, әлеуметтік-еңбек қатынастары және еңбекті қорғау жөніндегі басқарушы директоры Гибрат Ауғанов пен «Самұрық-Энерго» АҚ Басқарма Төрағасы Қайрат Мақсұтовтың қатысуымен өтті. Олар «Богатырь Көмір» ЖШС және Екібастұз 1-МАЭС бірінші басшыларының еңбекті қорғау және өндірістегі қауіпсіздікті қамтамасыз ету бойынша жүргізіліп жатқан жұмыстар туралы баяндамасын тыңдады.

Көшпелі мәжіліс аясында Қордың, басқа да портфельдік компаниялардың сарапшылары көмір разрезі мен  ЕМАЭС-те болды және өндірістік қауіпсіздік саласындағы өзекті мәселелер бойынша энергетикалық кәсіпорындардың тәжірибесімен алмасты. Нөлдік жарақаттанушылыққа қол жеткізу үшін ең алдымен жұмыскерлердің қауіпсіздік мәдениетін арттыру және қауіпсіз еңбек жағдайларын қамтамасыз ету қажет екендігі атап өтілді.

Мәжіліс қорытындылары бойынша қауіпсіз еңбек жағдайларын қамтамасыз ету және құру және кәсіпорын жұмыскерлерінің тұрмыстық жағдайларын жақсарту бойынша нақты тапсырмалар берілді.